Meeqqat inuusuttullu
Meeqqat inuusuttullu ineriartornerannut, atugaannut nammineersinnaanerannullu atugassarititaasut pilersinnissaannut kommunalbestyrelsi akisussaasuuvoq. Meeqqanut inuusuttunullu suliniutini suniluunniit meeqqat pisariaqartitaat aallaavigineqassapput, meeqqat isumassorneqarnerat qitiutillugu. Kommunalbestyrelsip suliassaraa meeqqat inuusuttullu atugaannik nakkutilliissalluni.
Titartagaq 3.1. 1.januaari 2015-imit Kalaallit Nunaanni nukappiaqqat niviarsiaqqallu 0-mit 17-inut ukiullit
Najoqqutaq: Naatsorsueqqissaartarfik - Kisitsisaataasivimmi kisitsisit takukkit http://bank.stat.gl/benst1
MIO - Meeqqat inuusuttullu Oqaloqatiginnittarfiat
Meeqqat Illersuisuat, Meeqqat pisinnaatitaaffiinik sullissivik aamma Meeqqat siunnersuisoqatigiit 1. marts 2012-imi aallartipput. Tassunga atatsillugu MIPI unitsinneqarpoq ilisimasanillu katsersivik meeqqat pisinnaatitaaffiinik sullissivimmut ilanngunneqarluni. Meeqqat pisinnaatitaaffiinik sullissivik MIO-mik (Meeqqat inuusuttullu oqaloqatiginnittarfiannik) ateqalerpoq. Juni 2015-imi Kalaallit Nunaat nutaamik Meeqqanut Illersuisoqalerpoq.
FN-p Meeqqanut isumaqatigiissusiaa aallaavigalugu meeqqat inuusuttullu inuiaqatigiinni isumannaatsuunissat soqutigisaasalu siuarsarnissaat MIO-p suliassatut pingaarnertut suliassaraa. Meeqqat inuusuttullu MIO-mi siunnersorneqarsinnaapput ilitsersorneqarsinnaallutillu. Innuttaasut, sulianik immikkut ilisimasallit poliitiikerillu aamma meeqqat pisinnaatitaaffiinnik sullissivimmut apeqquteqarsinnaapput isumasiuisinnaallutillu.
Meeqqat pisinnaatitaaffii pillugit, MIO-p SMS-ikkut siunnersuisarfia aammalu suliat allat pillugit paasissutissat nittartakkami www.mio.gl- mi takuneqarsinnaapput.
Meeqqanik inuusuttunillu angerlarsimaffiup avataanut inissiisarneq
Meeqqanik sumiginnaaneq allatulluunniit isumaginninnikkut ilungersunartorsiortitsineq pissutigalugu meeqqat peqqissusiat ineriartorneralluunniit ilungersunartumik ersarissumik navianartorsiortinneqarpat kommunalbestyrelsi aalajangiisinnaavoq meeqqap angerlarsimaffiup avataanut inissinneqarnissaanik. Tamanna aamma atuuppoq annersaanermi allatulluunniit atornerluinerni, atornerluinermik ajornartorsiornermi pinerluttuliornerni isumaginninnikkulluunniit ilungersunartorsiortitsinerni.
Ulloq unnuarlu paaqqinniffiit
Namminersorlutik Oqartussat ulluni makkunani ulloq unnuarlu meeqqanut inuusuttunullu paaqqinniffinnik qulingiluanik ingerlatsipput aammalu ulloq unnuarlu annertuumik innarluutilinnut arfineq marlunnik paaqqinniffinnik ingerlatsillutik. Paaqqinniffiit taakku kommuneqarfinnit aningaasarlersorneqarput. Namminersorlutik Oqartussat paaqqinniffinnik ingerlataasa saniatigut arfinillit namminersorluni paaqqinniffiupput paaqqinniffillu ataaseq kommunimit ingerlanneqarluni.
Erninerup nalaani sulinngiffeqarallartarneq ullormusiallu
Anaanaasoq erninissaq sioqqullugu sapaatit akunneri marluk erninerullu kingorna sapaatit akunneri 15-it sulinngiffeqarsinnaavoq; marlunnik amerlanernilluunniit ataatsikkut ernisoqarpat, anaanaasoq sapaatit akunnerinik 19-inik sulinngiffeqarsinnaatitaavoq. Ataataasoq erninermut atatillugu sap. akunnerinik pingasuni sulinngiffeqarsinnaatitaavoq. Sap. akunnerit 15-it pingasullu saniatigut anaanaasup ataataasullu sap. ak. 17-init namminneq piumasartik naapertorlugu avissinnaavaat. Marlulinermi amerlanernilluunniit ataatsikkut erninermi angajoqqaat katillugit sap. ak. 21-nik sulinngiffeqarsinnaatitaapput.
Meeravissiartaartut angajoqqaarsianngortullu meeravissiartaap meerarsiartaallu tiguneranut atatillugu sulinngiffeqarallartinneqarsinnaapput.
Meeqqanut tapiissutit aamma meeqqanut akilersuutit il.il.
Ilaqutariinnut meeralinnut immikkut tapersersuutitut qaammatit tamaasa meeqqanut tapiissutit meeqqanut 18-it inorlugit ukiulinnut tunniunneqartarput. Meeqqanut tapiissutit tunniunneqartarput ilaqutariit isertitaat 1. januaari 2012-imiit 280.000 koruunit qaangersimanngippatigit.
Qitornarsiartaarneq
Qitornarsiartaarnermi malittarisassat ikiorneqarnerlu nittartakkani ukunani atuarneqarsinnaapput: www.naalakkersuisut.gl aamma www.sullisivik.gl
Annertuumik innarluutillit
Inuit tarnikkut timikkulluunniit annertuumik innarluutillit sapinngisamik naammaginartumik atugassaqartinniarneqassapput. 1. januar 2011-miit timikkut innarluutilinnik tamakkiisumik isumaginninneq Namminersorlutik Oqartussaniit kommuneqarfinnut isumagineqarnera nuunneqarpoq.
Inuit annertuumik innarluutillit siusinaartumik pensionisianik pisartagaqartinneqalersinnaapput, siusinaartumik pensionisianut pisartagaqarnermut malittarisassat malippatigit.
Utoqqaat
Utoqqalinersiallit angerlarsimaffimminni imminut isumagisinnaanngitsut, kommunip utoqqaat illuinut nuunniarlutik qinnuteqarsinnaapput. Aammattaaq utoqqalinersiallit kommunip utoqqarnut illuutaanut nuukkallarniarlutik qinnuteqarsinnaapput.
Utoqqaat illui utoqqarnullu sammisaqartitsiviit kommuninit pilersinneqarlutillu ingerlanneqartarput.
Titartagaq 3.2. 2015-imi nunani assigiinngitsuni agguaqatigiissillugu utoqqalisarneq
Najoqqutaq: Naatsorsueqqissaartarfik
Siusinaartumik soraarnermusiat
Inuit 18-it sinnerlugit ukiullit utoqqaassutikkut ukiut 65-it utoqqalinersiaqalernissamut angusimagaanni siusinaartumik soraarnerusiaqartinneqarsinnaapput, pilersugaqartut 18-inik ukioqalernerminniit utoqqalinersiutinik aamma pisalersinnaapput. Inuit Nunat avannarliit Isumaqatigiissutaanut isumaginninnermut isumannaallisaanermut tunngasumut ilaasut siusinaartumik pensioninik pisalersinnaapput.
Utoqqalinersiat
Utoqqalinersiat 65-inik sinnerlugillu ukiulinnut tunniunneqartarput. Inuit Nunat avannarliit isumaqatigiissutaanut isumaginninnermut isumannaallisaanermut tunngasumut ilaasut utoqqalinersiutinik pisalersinnaapput.
Perululluni napparsimaneq imaluunniit toqusoqarneq
Qanimut ilaqutaasuni nappaammik peruluttoqartillugu imaluunniit toqusoqartillugu, inunnik isumaginninnermi malittarisassani aalajangersagaqarpoq angalanermut illerfimmillu assartuinissamut ikiorneqarnissamik.
Nittartagaq takuneqarsinnaasoq
Immikkortumut matumunnga tunngasoq ”Pitsaaliuineq ikiorsiinissamullu suliniarneq” nittartakkami www.sullissivik.gl imaluunniit www.naalakkersuisut.gl alakkaruk.